أنت تتصفح أرشيف موقع بنت جبيل

ايــام كـلا شـحــار

الثلاثاء 24 أيلول , 2013 01:00 بتوقيت مدينة بيروت - شاهده 10,245 زائر

 ايــام كـلا شـحــار


سافر حسن ع بلاد طابتلو

وابوابها للخير فتحتلو

وفيها نسي ايام كلا شحار

وكل التعب والهم جابتلو

والام حنت ل حبيب الدار

ومرسال مع جيران ودتلو

وقالت يا تقبرني بيكفي قهار

ودعوة قلب محروق دعيتلو

وفكرا سرح لبعيد كانوا زغار

وياما لحتى ينام غنتلو

واليوم ابنا شب برا صار

ولازم عروس تليق ب ال مثلو

وراحت لجارة بتحب المضمار

ونية تشوف البخت حسبتلو

وقالت البصارة الولد محتار

وع الفخ شقرا بنت علقتلو

وعليه ياما تحوكموا الانظار

وقلوب هالحلوين مالتلو

وهوني الام تشوشروا الافكار

وطلبت الخط وفور دقتلو

وقالت حبيبي عود لنو نهار

وقبل الحكي بالدمع قالتلو

ما عاد يمي تهمني الاسفار

وبقلب دايب ليش شرحتلو

يمي عليك القلب صاير نار

والعين للمحبوب حنتلو

يمي ارجعلي ما العمر ع شفار

يمي وبقلب الام عنتلو

وهالدار ع غيابك ما واحد زار

ولا باب بيتي دقدق وفتلو

يمي بغيابك دبلت الازهار

وع غيبتك يبس الحبق شتلو

يمي بيكفي تطول المشوار

ولا تزيد ع قلبي الوجع رتلو

يمي سنين العمر صاروا كثار

وايام عمري من المرض عتلو

والموت صفى يعزف الاوتار

والجسم كل مفاصلو عطلو

وفجاْة قلب امو العجوز انهار

وتكيت على حفة تخت مكسور

مطرح ما ابنا طفل هزتلو



محمد العبد حوراني - بنت جبيل.اورغ 

Script executed in 0.16663813591003