كتب المسعف في الصليب الأحمر جوني مخيبر، عن تجربته التي يخوضها في مواجه فيروس كورونا، حيث سرد خوف والدته عليه، وتغلبها على مخاوفها.
فنشر عبر حسابه على فيسبوك:"لمّا جيت تخَبّر أهلي إنو عندي training بالصليب الأحمر تصير إنقل مرضى عندُن إصابات Corona مأكدة، إمي قالت لاء. كِنت عارِف جوابا سَلَف، إمي إحساسا بيِسبَق تفكيرا دايما والسبب هو الخوف.. شو بدك بهالشغلة قالتلي، وهيك هيك شي إختياري بلاها.. ضحِكت وفلّيت عالأوضة، مِحتِرِم خوفا، بس بعرف إنو القرار اللي أخدتو مش من هلأ، من ٥ سنين لما اتطوعت وقبِلت بكل شي."
وتابع "قَطعِت نص ساعة، بتدّق باب الأوضة وبتفوت " فيي إحكيك؟ "بتقِلّي قرّبت صوبي بدا تشرحلي ليش جوابا كان لاء، قلتلا بعرف بلا ما تقولي بس أنا... قاطعتني وقالتلي بعرف بلا ما تقول.. روح إمي روح، كيف بدي إحِرمَك تطير وأنا قضّيت كل هالعمر عم كَبّرلَك جوانحَك.. وفجأة فات بيي، وضِحِك، فهِمت ساعتا إنو اللي ساعد إمي تِتغَلّب ع خوفا هو بيي.. بيي الجِذع القوي، المسؤول ويلي بيعرِف يَعطي ثقة بمطرحا، وأنا قد هالثقة.".
