توجه طلاب شهادة الثانوية الرسمية في ثانوية بنت جبيل برسالة إلى وزير التربية والتعليم العالي طارق المجذوب طرحوا فيها المشاكل النفسية والتقنية والتعليمية التي يواجهونها خلال مرحلة مواجهة كورونا الحالية وخاصة فيما يتعلق بالتعليم عن بعد والمناهج التعليمية، وقالوا:
"-أولاً، من أول ما عطلنا "عطلة كورونا" و نحنا نفسيتنا بالأرض، و بما انو لاغيين فكرة الافادات، مش عارفين مصيرنا لوين ولا حدا سألان.انا ما عم بحكي نيابة عن حدا، و في كتير طلاب مش هاممهن الموضوع، بس أنا طالب بدي اتخرج و ما يروح تعبي عالفاضي و بلش جامعة السنة الجاية متلي متل كل لي قبلي.
--ثانياً، قرار التدريس على الواتساب و غيرو، قرار فاشل بسبب الضغط النفسي الكبير اللي عم بيصير من ورا انو الاستاذ مصرّ يكفي المنهج عالتليفون و في كتير طلاب و انا منن بحياتن ما درسو عا تليفون الا اذا بدن ينقلوا فرض، ما في طالب بيدرس درس صحيح و التليفون بإيدو في ٥٠٠ شغلة عم تلهيه كل دقيقة، و المشكلة انو اذا ما التزمت شو عم يبعتلك الاستاذ، انت بتصير فاشل و مش داير ع درسك.
-ثالثاً، بعد ل هلق ما سمعنا قرار رسمي بإلغاء دروس من المنهج الرسمي المطلوب لحد هلق بكامله للإمتحان الرسمي.
و بهيدي النقطة ، يعني الوزير او غيرو متأمل نخلص المنهج قبل حزيران؟ هيدا غير انو كان في تأخير و تقصير بسبب التعطيل أثناء الاحتجاجات في بداية العام الدراسي.
--رابعاً، بحال كفينا مدارس بعد الإنتهاء من الأزمة الصحية (اللي مطولي) كيف سيتم تنظيم الموضوع بسهولة و سرعة هلقد؟ هوي اسرع قرار اخدتو معاليك كان بدو اسبوع ل سكرت المدارس، رح يكون في صعوبة و استحالة في كيفية تنظيم اكمال تدريس المنهج او الغاء الدروس، بشكل يكون الطالب قادر ينجح بالإمتحان الرسمي اذا كان عم يدرس من البداية، اما اذا ضلت الأمور ماشية بلا قرار رسمي يطمن الطلاب عالقليلي و يشيلن من الحالة النفسية المتوترة، حا تكون هي السنة أقل نسبة نجاح في تاريخ الشهادة الثانوية.
--خامساً ، بالنسبة ل التدريس على تلفزيون لبنان فكرة منيحة مش غلط رغم انو كان في كتير انتقادات بسبب انو كتير طلاب ما عندن كهربا ٢٤/٢٤، هيدا غير انو الإنترنت عم بكون ضعيف نتيجة الضغط، و الطلاب عم تواجه صعوبة بالدرس "اونلاين" ".
وختموا: "نحنا طلاب مرقت علينا سنة تحدينا كل شي ل نستمر و نموت كرمال نخلص هالمنهج اللي بلأصل لازم ينلغى كتير منو قصص مش ح تلزمنا ٢٠ سنة ل قدام، و رغم هالشي بعدنا مصرّين لازم نكفي المنهج "المقدس" عالآخر كرمال ننجح بالإمتحانات الرسمية. عالتلفزيون عالواتساب عم نحاول رغم كل المشاكل حوالينا، لكن عالقليلي طالبين قرار يخفف عن الطلاب شوية ضغط مش اكتر، لإنو مصيرنا مش معروف وينو ضايع " .
بنت جبيل.أورغ
