عبر حسابه الخاص، نشر البروفيسور اللبناني د.حسين جلوس من إيطاليا عن بطولات الأطباء والممرضين الذين هم أبطال حرب لم يكونوا يتوقعوها، فكتب
"جملة إجت براسي اليوم الصبح، بلحظة كان فيها الركض يمين و شمال بأعلى مستوياتو لتنظيم استقبال دفعات المرضى، إنو “الأطباء والممرضين هني حالياً أبطال من نوع جديد، أبطال بحرب ما كانوا بيتوقعوها، حرب ضد عدو قوي و خفي، هوي بيشوفك بس انتا ما بتشوفو".
وتابع كاتباً "بيقولو الحياة بتخلص و العلم ما بيخلص و نحنا كل يوم عم نتعلم دروس عن الحياة حتى لو بعد ٣٠ سنة من العمل بهالمجال. بتعرف قيمة الحياة بس تشوف كيف عم تنفقد قدام عيونك، و بتحزن لأنك بتحسّ انك مش قادر تعمل شي لتمنع او توقف القدر. مش مهمّ و ما بيغيّر شي اذا المريض شب او مسنّ."
وسرد ما عاشاه ويعيشه الأطباء خلال متابعة حالات المصابين بكورونا والتصدي للفيروس "صرنا ننام على شي و نفيق تاني يوم على شي مختلف تماما. كل يوم لازم تكون جاهز لتواجه الأرقام الصادمة و تحضّر حالك لإستقبال المجهول و شو حامل معو.
ممكن حدا شاف صورة عالنت. قافلة شاحنات عسكرية طويلة عم ينقلو التوابيت من المدينة لأنو ما بقا في محلات بالمقابر و آخدينن عمطرح تاني. بيندفنوا و ما حدا عم يودعن، لا اهل و لا قرايب."
وتابع قائلاً: "٢٧٠٠ صار عدد الإصابات بين اطباء و ممرضين، و اكترهم، يعني تقريبا شي ١٧٠٠ بس بآخر ٥ ايام. يعني اصابات الجسم الطبي هيي تقريبا ٨ % من اجمالي الإصابات. في نقص كبير بوسائل الحماية الشخصية و كمان صعوبة بإنك تلاقيها بسبب إغلاق الممرات الحدودية، لذلك احيانا بتضطر انك ترجع تستعملها. يعني نحنا بخطر دايم، بنعرف انو عم نخاطر كل يوم، و عم نختبر الخوف المستمر، من انو نحمل الفيروس على بيوتنا و نخاطر بأهلنا و بولادنا."
وأضاف "النقص مش بس بوسائل الحماية، كمان بالأطبّا و الممرضين. الدولة بتحاول جمع اكبر عدد منن للعمل، حتى اللي بعدهم ما عملو امتحان التأهيل يعني الكوللوكيوم او اللي عم يعملوا إختصاص يعني residents و بعدن ما خلّصوا. كمان كتار من الأطبا اللي طلعو عالتقاعد رجعوا التحقو من جديد بمراكز عملن السابق او بمراكز جديدة. الطاقم التمريضي مُنهك اكتر من الطاقم الطبي، و في نقص هائل بالأعداد، كل يوم بتوصل دفعات جديدة إن كان محليين او من برا."
وختم بالقول "العمل بحالة طوارئ مستمرة مش سهل ابدا و بدك تكون دايما واعي و جاهز".
