نشرت فتاة تدعى ملاك سحمراني عبر حسابها على فيسبوك حادثة مؤلمة حصلت في بيتها امس.
حيث كتبت قائلة: "اليوم قبل الإفطار ب 5 دقائق،سمعنا صوت الباب فجأة عم بدقّ دقّات خجولة.. كنا عم نتحضر لنقعد على طاولة الأكل و بنركض كلنا على الباب لنشوف مين إجى لعنا.. بيفتح الباب بابا لصبي صغير عمره بين 12 و 13 سنة بقلّوا يا حاج أنا يتيم و بدي إفطر و ما حدى عم يفتحلي لوهلة كلنا انصدمنا و اطلعنا ببعض و فجأة منفوت ببعضنا ويلنا بدنا نواسيه و يلنا بدنا نحضرله صحن أكل و نفطره و نجبر خاطره ..
جيت عم بعطي الصّحن لما شاف الصّحن في دجاج و رز و فتوش دمّعوا عيونوا و ابتسم ابتسامة مع دمعة شلعتلي قلبي من محلّه.. ما بعرف ليه حسيت الدنيا اسودت بوجي. نحن بزمن صعب كثير.. في ناس عنجد ما عندها لقمة أكل و عم تلجأ لبيوتنا ل تاكول .. وحياة محبّتكن لأهل البيت و حياة علي(ع) بيّ الأيتام.. ما تكسروا بهالأيام بخاطر ولا ولد دق باب بيتكم و اتذكّروا قصة أهل البيت لما نزلت فيهن آية:(وَيُطْعِمُونَ الطَّعَامَ عَلَىٰ حُبِّهِ مِسْكِينًا وَيَتِيمًا وَأَسِيرًا) الله ببارك بكل إنسان عم يعطي و يقدّم بهالأيام السودة..".
